خِراوِم خِراوِم خِراوِ خِراو
خِراو نی بِجز حالِ بی حالِ مِه
مِه خُوم دَس بِرارِ غم و دَردِم و
بِجز غصه نُومایه ری فالِ مِه
خدا رَنگ پاشَن وِ ری جُونِ مِه
چَشِ سرخ و بَخت سیِه،ریِ زرد
اگر عشق اُوما وِ سیکِ دلِم
دلِم جنسِ شیشه،دلِش جِنسِ بَرد
خِراوِم خِراو چی مَسی لوئِه جو
پیالَه دِ خینِ خُومَه نو‌شِ خُوم
دِ ویرِ همه رَت چَشِم،غِیو بیم
دلِ خُوم...دلِ خُوم...فِراموشِ خُوم
خِراوِم هِه چی پیرَمَردی کِه مُرد
ولیکن سه جِلدِش هِه سی سال داشت
مِه پیرِم،مِه صَد سالَه کِه مُردِمَه
فرشته کِه کُشتِم چَشا کال داشت
مِه خُوم دَردِ خیلی گِرونی بیِم
مه ِخُوم آسِمُونی کِه اُفتا وِ خاک
مِنِم لیزِ هَر چی غَم و داغ و دَرد
مِنُو قلبِ کُوت کُوت بیِه پاکِ پاک...
رَتی و دِ دُومِت خُوشی رَت دِ دَر
رَتی عمرِ شادیِ مِه رَت وِ سَر
رَتی تا مِه بی کَس بَمُونِم ِو جات
تو اما رَتی،دِل وِ ری خاک مَن
رَتی تا دِلِم حُوشکِه خی جُو بَنَه
دِلِم دِل دِ دنیا چِه آسُو بَنَه
رَتی تا دِ ای زِندگی سیر بام
دِ قُوم و دِ خویش و دِ خُوم دیر بام
رَتی مَن وِ میراتِ عِشقِت دِلِم
رَتی هَم غَمِت مَن وِ جا وا سَرِم